Arallgyfeirio fferm deuluol – De Eryri

Y briff

Mae teulu Jones yn rhedeg fferm deuluol gyfeillgar ac yn rhan sylweddol o’r gymuned leol a’r rhwydwaith ffermio. Mae eu plant ifanc yn mynychu’r ysgol leol, ac maent yn ymwneud ag amrywiaeth o weithgareddau lleol. Penderfynodd y teulu y byddai arallgyfeirio i gynnig podiau glampio yn helpu gyda phroffidioldeb a hyfywedd y fferm. Roeddent eisiau help gyda chais i’r awdurdod cynllunio lleol (Awdurdod Parc Cenedlaethol Eryri). Cafodd paratoi’r cais llawn ei lywio gan gyflwyno ymholiad cyn-ymgeisio a gadarnhaodd y canlynol fel rhestr o eitemau gofynnol;

• Cynlluniau safle
• Drychiadau a chynllun y llety
• Arolwg ecolegol – Asesiad Ecolegol Rhagarweiniol
• Arolwg coed
• Asesiad effaith weledol
• Asesiad draenio (ar gyfer safleoedd sydd angen gosod tanciau septig newydd)
• Cynllun busnes fferm

Roedd y cais hefyd yn defnyddio’r canllawiau cynllunio atodol ar Lety Ymwelwyr a gyhoeddwyd gan Awdurdod Parc Cenedlaethol Eryri yn 2019. Bwriad y ddogfen yw rhoi canllawiau ychwanegol i ymgeiswyr a swyddogion cynllunio ar bolisi cenedlaethol er mwyn llywio penderfyniadau’n well o ran codi strwythurau at ddibenion twristiaeth.

Prif amcan a chyfyngiadau

Y prif amcan oedd cael caniatâd cynllunio, ac er bod y canllawiau cynllunio atodol cyhoeddedig yn cynnig cefnogaeth, roedd yr her o gyflawni gofynion manwl y canllawiau yn gyfyngiad. Roedd y cleient yn edrych i fuddsoddi yn y seilwaith ffisegol felly roedd cadw costau proffesiynol mor isel â phosibl hefyd yn amcan. Mae cael caniatâd cynllunio o fewn Awdurdod Parc Cenedlaethol Eryri yn aml yn heriol ac yn aml mae gofyn cynhyrchu nifer sylweddol o adroddiadau gan arbenigwyr cymwys.

Camau gweithredu a chanlyniad

Fe wnaethon ni weithio gyda’r cleient ac ymgynghorwyr eraill (ecolegydd, peiriannydd draenio) i baratoi’r gwaith papur gofynnol.

Fe wnaethon ni weithio gyda’n cleient i gael y cais o flaen y pwyllgor cynllunio. Mae polisi a chanllawiau cynllunio yn destun dehongliad a dylent ystyried amgylchiadau ffermydd unigol i’w hystyried a’u hadolygu, gan bwyso a mesur gwahanol ffactorau i ddod i benderfyniad gwybodus. Os na all swyddog cynllunio argymell y cais i’w gymeradwyo, yna mae angen mewnbwn pwyllgor cynllunio neu, weithiau, yr arolygiaeth gynllunio.

Yn dilyn y cyflwyniad gan y cleient i’r pwyllgor, roeddent yn llwyddiannus gyda’r cais i osod unedau glampio ar eu fferm yn Ne Eryri. Roeddent yn benderfynol wrth geisio cael caniatâd llwyddiannus, gan wybod, o safbwynt busnes, ei fod yn hanfodol ar gyfer diogelu ffynhonnell incwm y fferm ar gyfer y dyfodol.